ٹویٹس

آج لاہور میں مولانا عبد الرؤف فاروقی، مولانا عبد الرؤف ملک اور حاجی عبد اللطیف چیمہ کے ہمراہ ’’پاکستان قومی زبان تحریک‘‘ کے صدر جناب محمد جمیل بھٹی، نائب صدر پروفیسر محمد سلیم ہاشمی اور دیگر راہنماؤں سے ملاقات کے دوران آٹھ ستمبر کو قومی زبان کا دن منانے اور لاہور میں قومی زبان کانفرنس کے انعقاد کے حوالے سے تبادلۂ خیال ہوا اور اتفاق رائے سے اس کی بھرپور محنت کی ضرورت پر زور دیا گیا۔ تمام ہم خیال دوستوں سے تعاون کی درخواست ہے۔

امریکی صدر ٹرمپ اور وزیرخارجہ پومپیو بار بار کہہ رہے ہیں کہ عرب امارات کے بعد دیگر عرب ممالک بھی اسرائیل کو تسلیم کرنے والے ہیں۔ جبکہ پاکستان اور سعودی عرب کے بعد او آئی سی کی طرف سے بھی آزاد فلسطینی ریاست کے قیام اور فلسطین کے مسئلہ کے باوقار حل تک اسرائیل کو تسلیم کرنے سے انکار سامنے آگیا ہے۔ اور ڈاکٹر مہاتیر محمد کا کہنا ہے کہ اسرائیل کو تسلیم کرنا امت مسلمہ کی باہمی تقسیم اور محاذ آرائی کا باعث بن سکتا ہے۔

سابق وفاقی وزیر مذہبی امور سردار محمد یوسف خان صاحب نے آج فون پر خوشخبری سنائی ہے کہ مانسہرہ سے آگے کڑمنگ بالا کی جس پہاڑی چوٹی چیڑاں ڈھکی میں ہمارے دادا محترم جناب نور احمد خان رحمہ اللہ تعالٰی رہتے تھے، وہاں خاصی آبادی ہو گئی ہے اور مسجد بھی بن گئی ہے، جس میں جمعۃ المبارک کا آغاز یکم محرم الحرام ۱۴۴۲ھ کو ہوا ہے اور سردار محمد یوسف خان بھی اس میں شریک ہوئے ہیں۔ ہمارے خاندان کے لیے نئے ہجری سال کی یہ پہلی خوشخبری ہے جس پر ہم سردار صاحب محترم کے شکرگزار ہیں۔ اللہ تعالٰی مسجد کو ہمیشہ آباد رکھیں اور ہمارے دادا مرحوم اور دیگر خاندانی بزرگوں کو کروٹ کروٹ جنت نصیب فرمائیں، آمین یا رب العالمین۔

پاکستان اور سعودی عرب کی طرف سے اسرائیل کو تسلیم نہ کرنے کا اعلان فلسطینیوں کے جائز موقف اور جدوجہد کی پاسداری ہے، جبکہ اس کے ساتھ فلسطینیوں کے لیے عالمی رائے عامہ کی حمایت کو منظم اور امت مسلمہ کو مجتمع و متحرک کرنا بھی ضروری ہے، جو پاکستان، سعودی عرب اور ترکی مشترکہ طور پر کر سکتے ہیں۔

’’امریکی خاتون اول مسز ہیلری کلنٹن اسلام آباد کالج فار گرلز کی اساتذہ اور طالبات کے ساتھ گھل مل گئیں اور ان سے ایک گھنٹے سے زیادہ بے تکلفانہ گفتگو کی۔ ہیلری کلنٹن نے طالبات سے ان کے مسائل دریافت کیے۔ طالبات نے دوستانہ انداز میں کلنٹن کی اہلیہ کو سب مسائل بتائے۔ فورتھ ایئر کی طالبہ نائلہ خالد نے امریکی خاتون اول سے پوچھا کہ امریکی طالبات کا بنیادی مسئلہ کیا ہے؟ اس پر امریکہ کی خاتون اول نے کھل کر گفتگو شروع کی۔ انہوں نے کہا کہ پاکستان کی طالبات کا مسئلہ تعلیم کی مناسب سہولیات کا فقدان ہے، تعلیمی اداروں میں فنڈز کی کمی کا مسئلہ ہے، مگر امریکہ میں ہمارا سب سے بڑا مسئلہ یہ ہے کہ وہاں بغیر شادی کے طالبات اور لڑکیاں حاملہ بن جاتی ہیں۔ اس طرح بے چاری لڑکی ساری عمر بچے کو پالنے کی ذمہ داری نبھاتی ہے۔ ایک دوسری طالبہ وجیہہ جاوید نے کہا کہ اس مسئلہ کا کیا حل ہے؟ اس پر ہیلری کلنٹن نے کہا کہ اس مسئلے کا حل یہ ہے کہ نوجوان لڑکے لڑکیوں کو خواہ وہ عیسائی ہوں یا مسلمان اپنے مذہب اور معاشرتی اقدار سے بغاوت نہیں کرنی چاہیے۔ مذہبی و سماجی روایات اور اصولوں کے مطابق شادی کے بندھن میں بندھنا چاہیے۔ اپنی اور اپنے والدین کی عزت و آبرو اور سکون کو غارت نہیں کرنا چاہیے۔ مسز ہیلری کلنٹن نے کہا کہ وہ اسلام اور عیسائیت کی شادی کے خلاف نہیں ہیں، انہوں نے کہا کہ پاکستان میں مذہبی روایات کا احترام کرتے ہوئے شادی ہوتی ہے اس لیے یہاں لڑکیوں کے مسائل کم ہیں۔‘‘ (جنگ لاہور ۲۸ مارچ ۱۹۹۵ء)

امت مسلمہ کا اصل مسئلہ بلکہ المیہ یہ ہے کہ عالمی سطح پر کوئی ایسا فورم موجود نہیں ہے جو اس کی اجتماعی اور مؤثر قیادت یا کم از کم نمائندگی ہی کر سکے۔ جو برائے نام دکھائی دیتے ہیں وہ خود مختار نہیں ہیں۔ اس لیے خلافت راشدہ کی اصولوں کی بنیاد پر خلافت کا قیام ہی ہمارے مسائل کا واحد حل ہے۔

ہر سال چودہ اگست کو یہ احساس ہوتا تھا کہ ہم یوم آزادی تو منا رہے ہیں مگر کشمیر کے بغیر پاکستان مکمل نہیں ہے۔ اس سال کشمیر کو پاکستان کے سرکاری نقشے میں شامل کرنے کے بعد پاکستان کے جغرافیائی طور پر نامکمل ہونے کی تصدیق بھی ہو گئی ہے۔ سوال یہ ہے کہ یہ مکمل کب ہو گا اور اس میں کس کا کیا کردار ہو گا؟

چودہ اگست آزادی اور قیام پاکستان کا دن ہے۔ ہم ہر سال اس بے مقصد بحث میں پڑ جاتے ہیں کہ کس نے حمایت کی تھی اور کون مخالف تھا؟ جب قیام پاکستان کے بعد حمایت اور مخالفت کرنے والے سب اس کی بقا و استحکام کے لیے ایک پیج پر ہیں، تو اس بے مقصد جگالی کی بجائے اس کی ترقی سب کا مقصد وحید ہونا چاہیے۔

قرآن کریم نے اپنے نزول کا مقصد خود ’’لتحکم بین الناس‘‘ بیان فرمایا ہے، اس لیے جب تک انسانی معاشرے یا کم از کم مسلم معاشرے میں قرآن کریم کا حکم و قانون عملًا نافذ نہیں ہو جاتا ‘‘لتحکم بین الناس‘‘ کا پیغام پوری نسل انسانی کی طرف متوجہ رہے گا اور اس پر عملدرآمد امت مسلمہ بالخصوص علماء کے ذمہ ہو گا۔

استنبول کی تاریخی عمارت آیاصوفیہ کی مسجد کی حیثیت بحال ہونے پر جو خوشی ہوئی تھی، لاہور کی تاریخی مسجد وزیرخان میں فلم کی شوٹنگ کے افسوسناک واقعہ نے اسے غم میں تبدیل کر دیا ہے۔ اسی سے آزاد ذہن اور غلامانہ سوچ کا فرق معلوم کیا جا سکتا ہے، اللہ پاک ہمیں بھی آزادانہ سوچ عطا فرما دیں، آمین۔

مدرسہ صداقت الاسلام گوندلانوالہ گوجرانولہ میں گزشتہ شب غنڈہ عناصر کی طرف سے غاصبانہ قبضہ کی شدید مذمت کرتے ہوئے ان کے خلاف بروقت قانونی کاروائی پر ضلعی حکام کا شکریہ، اور جمعیت اہل سنت کے راہنماؤں کو محنت پر شاباش۔ اللہ پاک سب کو جزائے خیر سے نوازیں، آمین یا رب العالمین۔

آزاد کشمیر کی حکومت اور علماء سے میرا ایک پرانا سوال چلا آرہا ہے کہ جہاد کے جس شرعی فتوٰی پر آزاد ریاست کا یہ خطہ حاصل کیا گیا تھا اور حکومت قائم ہوئی تھی، وہ قائم ہے یا خدانخواستہ ختم ہو گیا ہے؟ اگر وہ قائم ہے تو حکومت اور علماء کرام کو سرپرست اداروں کے اعتماد کے ساتھ اس کی صورت نکالنی ہو گی۔

پشاور کی عدالت میں مبینہ گستاخ رسول کے قتل کو بین الاقوامی معاہدوں اور قانونی موشگافیوں کی بجائے سماجی تناظر میں دیکھا جائے۔ جہاں عدالتی طور پر ثابت شدہ گستاخ کو فیصلہ کے مطابق سزا نہ ملتی ہو اور گستاخانہ رویوں کی حوصلہ افزائی مقتدر حلقوں میں ہوتی ہو، وہاں اس کے علاوہ اور کیا ہو سکتا ہے؟

ہمارے حکمران کسی بین الاقوامی معاہدہ میں شریک ہوتے وقت قومی سوچ، عوامی جذبات، تہذیبی و نظریاتی تقاضوں، اور ممکنہ نتائج و عواقب کو ایک طرف رکھتے ہوئے آنکھیں بند کر کے دستخط کر دیتے ہیں۔ لیکن جب ان معاہدات کے جال میں جکڑے ہوئے خود بے بسی سے پھڑپھڑانے لگتے ہیں تو انہی قومی اثاثوں کی بے دریغ قربانی دیتے چلے جاتے ہیں۔ فیا اسفاہ و یا ویلاہ۔

قضا کی بہ نسبت تحکیم اور ثالثی میں مسائل کو سلجھانے اور کسی ایک بات پر فریقین کو لا کر فیصلہ کرنے میں سہولتیں اور گنجائشیں زیادہ ہوتی ہیں، جو موجودہ دور کی اہم سماجی ضرورت ہے۔ قضا اور فیصلے کی تنفیذ حکومتی اداروں کا کام ہے، مگر اس سے نیچے رہتے ہوئے باقی سارے کام دارالافتاء کی سطح پر منظم کیے جا سکتے ہیں۔

ایک محترم دانشور کا کہنا ہے کہ آزادی رائے کے مروجہ نظام و فلسفہ کی بنیاد حضرت عمر رضی اللہ عنہ کے اس ارشاد پر ہے کہ ’’تم نے لوگوں کو کب سے غلام بنا لیا ہے، جبکہ ان کی ماؤں نے انہیں آزاد جنا ہے‘‘۔ سوال یہ ہے کہ اگر حضرت عمرؓ کے ارشاد کا مطلب یہی ہے تو وہ ہاتھ میں ہر وقت کوڑا کیوں رکھتے تھے؟

توہین رسالت کو قابل سزا جرم قرار دینے پر سیکولر حلقوں کا کہنا ہے کہ یہ آزادی رائے کے خلاف ہے۔ اب ’’تحفظ بنیاد اسلام بل‘‘ میں توہین صحابہ کرامؓ کو جرم قرار دینے پر گورنر پنجاب کے نام درخواست میں کہا گیا ہے کہ یہ انسانی حقوق کے منافی ہے۔ گویا توہین کو جرائم کی بجائے حقوق میں شمار کیا جائے، فیا للعجب۔

پنجاب اسمبلی میں ’’تحفظ بنیاد اسلام بل‘‘ کی منظوری اسلامی جمہوریہ پاکستان کی نظریاتی اساس اور دستور کے ساتھ کمٹمنٹ کا عملی اظہار ہے، جس پر اسپیکر، ارکان اسمبلی، اور صوبائی حکومت سب مبارک و تحسین کے مستحق ہیں، اور ان کا یہ اقدام باقی صوبائی حکومتوں اور وفاق کے لیے بھی نمونہ ہے، فجزاھم اللہ۔

تمام شہریوں کے لیے یکساں نصاب تعلیم اہم قومی تقاضا ہے۔ مگر حقیقی یکسانیت کے لیے ضروری ہے کہ معروضی تعلیمی ماحول کے تینوں بڑے دائروں (۱) ریاستی تعلیم گاہوں (۲) دینی مدارس اور (۳) پرائیویٹ تعلیمی اداروں کے نمائندے باہمی مشاورت و مفاہمت کے ساتھ مشترکہ نصاب طے کریں، ورنہ یہ محض خانہ پری اور تکلف ہوگا۔

صدر ٹرمپ کا کہنا ہے کہ کرونا بحران کے دوران ماسک لازماً پہننے کا حکم امریکیوں کی آزادی سلب کرنا ہے۔ گویا فرد کی آزادی میں ریاست و حکومت کو بھی دخل دینے کا حق نہیں ہے۔ صدر محترم سے سوال ہے یہ آزادی صرف فرد کا حق ہے یا اقوام و ممالک کو بھی آزادی اور خودمختاری کا کوئی حق حاصل ہے؟

تعلیم بالخصوص دینی تعلیم کو اپنی ناگزیر بنیادی ضرورت سمجھ کر اس کے بارے میں حکومتی پالیسیوں کا تعین کرنا ہماری قومی ذمہ داری ہے۔ اس لیے تمام متعلقہ اداروں اور حلقوں کو اپنی اپنی موجودہ روش پر نظر ثانی کرتے ہوئے مناسب ایس او پیز کے ساتھ تعلیمی ادارے جلد کھولنے کی کوشش کرنی چاہیے۔

ایک دوست نے سوال کیا ہے کہ پاکستان قومی ریاست ہے یا اسلامی؟ گزارش ہے کہ دستور اللہ کی حاکمیت اعلٰی، قرآن و سنت کی بالادستی، اور شرعی قوانین کے نفاذ کی بات کرتا ہے اور اسلام کو ریاست کا سرکاری مذہب قرار دیتا ہے۔ اگر قومی ریاست اسی کو کہتے ہیں تو بے شک اسے (پاکستان کو) بھی کہہ لیں، ہمیں کوئی اعتراض نہیں ہے۔

آیا صوفیہ کی مسجد کی حیثیت بحال ہونے پر بعض حضرات کو اشکال ہے کہ کیا چرچ کو مسجد میں تبدیل کیا جا سکتا ہے؟ گزارش ہے کہ یورپ اور امریکہ میں سینکڑوں مساجد ایسی موجود ہیں جو چرچ خرید کر بنائی گئی ہیں، مگر مسیحی دنیا کی طرف سے ان پر کوئی باضابطہ اشکال سامنے نہیں آیا، اس لیے یہ بات بے محل ہے۔

جب تک ہماری اشرافیہ اور اسٹیبلشمنٹ پاکستان کی نظریاتی شناخت تہذیبی تشخص اور بیرونی مداخلت سے آزاد قومی خود مختاری کے ساتھ اپنی کمٹمنٹ کو درست کر کے اس کے لیے مخلص نہیں ہو جاتی، ہم اسی طرح مسلسل بحرانوں کا شکار رہیں گے۔ یہ آج کر لیں یا سو سال بعد، معاملہ انہی کے ہاتھ میں ہے اور رہے گا۔