ٹویٹس

کرونا بحران قابو میں آتا دکھائی نہیں دے رہا، میڈیا اس کی ذمہ داری مسجد پر ڈال رہا ہے، اور میڈیا کے بارے میں مولانا طارق جمیل کی شکایت بھی بیجا نہیں ہے۔ کیا ایوان صدر میڈیا اور مسجد کے درمیان ہم آہنگی اور اشتراک عمل کے اہم تقاضے کے لیے کوئی کردار ادا نہیں کر سکتا؟ ایک سنجیدہ سا سوال ہے۔

ڈاکٹر صاحبان کا مطالبہ ہے کہ وبا کی شدت کی وجہ سے مساجد کے اجتماعات پر پابندی لگا دی جائے، جبکہ وزیراعظم محترم کا کہنا ہے کہ اگر ہدایات کی پابندی نہ ہوئی تو مساجد بند کی جا سکتی ہیں۔ اس لیے مساجد کو کھلا اور کسی حد تک آباد رکھنے کے لیے سرکاری ہدایات کی پابندی کا سب کو اہتمام کرنا چاہیے۔

آج اکیس اپریل ہے، شاعر مشرق و مفکر پاکستان علامہ محمد اقبال رحمۃ اللہ تعالٰی کا یوم وفات، جو ہمارے قومی محسن ہیں۔ مگر ہم شاید اس لیے ان کو بھول جانے کی کوشش کر رہے کہ وہ خدا کا نام لیتے تھے اور محبت رسول صلی اللّٰہ علیہ وسلم کا درس دیتے تھے، اللہ تعالٰی انہیں جنت میں اعلی مقام عطا فرمائیں، آمین۔

یہ وقت ایک دوسرے کو کو کوسنے اور طعنے دینے کا نہیں، مل جل کر بحران سے خود بچنے اور دوسروں کو بچانے کا ہے۔ آگ کیسے لگی ہے اور کس نے لگائی ہے، سب کچھ اپنے وقت پر سامنے آئے گا اور قدرت کی سزا سے بچ نہیں سکے گا، ابھی آگ بجھانے پر ساری توجہ ضروری ہے۔

لاک ڈاؤن میں دو ہفتے کی توسیع کے ساتھ بعض شعبوں میں مشروط کاروبار کی اجازت دے دی گئی ہے، جو مناسب ہے۔ مسجد و عبادت اصولاً لازمی سروسز میں شامل ہیں، اگر ارباب اختیار اسے ناگزیر کاروباری شعبوں میں ہی شمار کر لیں تو یہ ان بھلائی سمجھی جائے گی اور اللہ تعالٰی راضی ہوں گے، سنجیدہ توجہ درکار ہے۔

لوگوں سے کہا جائے کہ کرونا بحران کے دوران مسجدوں میں ہجوم نہ کریں، گھروں میں نماز باجماعت کا ماحول و معمول بنائیں تو بات سمجھ میں آتی ہے، اس سے گھروں میں نماز تلاوت کے ذریعے برکت کا ماحول بھی بحال ہوگا۔ مگر مساجد میں نماز باجماعت معطل یا محدود تر کر دی جائے، مسلم معاشرے کے لیے قابل فہم نہیں ہے۔

ایک سوال ذہن میں گردش کر رہا ہے کہ کیا کرونا وائرس ظاہری اسباب میں سے ہے یا غیبی؟ جو دکھائی نہیں دیتا، کام کرتے ہوئے بھی محسوس نہیں ہوتا، اس کی کارکردگی صرف نتائج سے معلوم ہوتی ہے۔ اور کیا اس کا علاج ظاہری اسباب کے ساتھ کرنے کی ضرورت ہے یا غیبی اسباب کی طرف رجوع بھی ضروری ہے؟

آج دس اپریل کو مرکزی جامع مسجد شیرانوالہ باغ گوجرانوالہ میں جمعہ کی اذان ڈیڑھ بجے ہوگی، اردو بیان نہیں ہوگا، اذان ثانی پونے دو بجے اور اس کے بعد عربی خطبہ اور جماعت ہو گی، ان شاء اللہ تعالٰی۔ احباب وضو اور سنتوں کا اہتمام گھروں میں کریں، شکریہ۔

پرانی کہاوت ہے کسی گاؤں میں کچھ لوگ ایک منہ زور بیل کو خصی کرنا چاہتے تھے مگر وہ قابو نہیں آ رہا تھا۔ ایک دن وہ کنویں میں گر کر پھنس گیا اور لوگ اسے نکالنے کے لیے جمع ہوئے تو ایک ستم ظریف نے آواز لگائی یہ موقع ہے خصی کر لو۔ ہمارے دینی حلقے آج کل اسی صورتحال سے دوچار نظر آ رہے ہیں، اللہ حفاظت فرمائے، آمین۔

نبی کریم صلی اللہ علیہ وسلم نے صدقہ کی بہترین صورت یہ بیان کی ہے کہ بائیں ہاتھ کو پتہ نہ چلے کہ دائیں نے کہا خرچ کیا ہے۔ اس لیے کسی مستحق کی مدد کرتے وقت اس کی عزت نفس کا خیال کرتے ہوئے نمائش اور تشہیر سے جس قدر گریز کیا جائے بہتر ہے۔ اللہ تعالٰی قبولیت سے نوازیں، آمین ثم آمین یا رب العالمین۔

اس بڑے دنگل کا کامیاب تجربہ اس سے قبل الجزائر میں کیا جا چکا ہے جس میں ایک لاکھ کے لگ بھگ شہری لقمہ اجل بنے تہے۔ یہ ہماری مجموعی دینی قیادت کے لیے بڑی آزمائش کا مرحلہ ہے، اللہ تعالٰی حوصلہ بصیرت اور استقامت سے نوازیں آمین یا رب العالمین۔

پنجاب حکومت کی طرف سے کوئی واضح اعلان نہ ہونے کی وجہ سے نماز جمعہ کی ادائیگی کے حوالے سے صوبہ بھر کے لوگ تذبذب کا شکار ہیں۔ وزیر اعلیٰ پنجاب سے درخواست ہے کہ دوٹوک پالیسی کا اعلان کریں۔

ملک بھر میں جو شخصیات، ادارے اور تنظیمیں کرونا وائرس کے متاثرین اور مستحق لوگوں کی خدمت کام کر رہی ہیں، لائق تحسین ہیں۔ بیرون ملک رہنے والے پاکستانی حضرات سے گزارش ہے کہ وہ بھی اپنے اپنے علاقوں میں ان کا ہاتھ بٹائیں۔

ایک سیاسی راہنما کا ارشاد ہے کہ کرونا بحران میں سیاسی اور مذہبی کارڈ استعمال نہ جائے۔ ارشاد بجا، مگر دعا، توبہ اور استغفار کی تلقین بھی کہیں مذہبی کارڈ کا استعمال تو شمار نہیں ہوگی؟

مجہے کسی نے رجب طیب اردگان کی والدہ محترمہ کے جنازے کی پوسٹ بھیجی ہے جس پر میں نے ٹویٹ کیا ہے۔ اب معلوم ہوا ہے کہ محترمہ کی وفات کئی سال قبل ہوئی تھی، بہرحال دعا تو کسی وقت بھی کی جا سکتی ہے، اللہ تعالٰی جنت میں ان کے درجات بلند فرمائیں آمین۔

بعض خطباء کرام نے مساجد اور نماز با جماعت کے بارے میں سرکاری احکام کے حوالے سے پوچھا ہے، میں نے عرض کیا ہے کہ علماء کرام نے اپنے موقف کے ابلاغ اور وضاحت کی ذمہ داری بحمد اللہ ہر فورم پر پوری کر دی ہے، اب سرکاری احکامات کی پابندی کرنا ہی وقت کا تقاضہ ہے۔

مجھ سے سوال کیا گیا ہے کہ کیا ان حالات میں قنوت نازلہ پڑھنا چاہیے؟ میں نے عرض کیا ہے کہ میں تو الشریعہ اکادمی گوجرانوالہ کی مسجد میں نماز فجر میں کشمیر کے لاک ڈاؤن کے بعد سے مسلسل پڑھ رہا ہوں، جس میں اب وبا اور بلاء سے تعوذ کی دعا بھی شامل کر لی ہے، مگر اعلان کسی دارالافتاء کو کرنا چاہیے۔

آج ’’یوم پاکستان‘‘ ہے، اب سے اسی برس پہلے ہم نے جنوبی ایشیا کے مسلمانوں کی تہذیب و ثقافت اور اسلامی نظریاتی شناخت کے تحفظ کے لیے ’’قرارداد پاکستان‘‘ کی صورت میں جدوجہد کا آغاز کیا تھا۔ آج پاکستان آزمائشوں اور مسلم تہذیب شدید خطرات کی زد میں ہے اور ہم سے اسی عزم کی تجدید کا تقاضا کر رہی ہے۔

مجھ سے بعض دوستوں نے موجودہ صورتحال میں اہل علم کی مختلف آرا کے حوالہ سے دریافت کیا ہے۔ میری خواہش اور کوشش ہوتی ہے کہ اجتماعی معاملات میں مشترکہ موقف کی کوئی صورت بن جائے، بصورت دیگر عمل کے لیے جامعہ دارالعلوم کراچی کے موقف کو ترجیح دیتا ہوں۔

ایک کہاوت ہے کہ کوئی شخص نہر میں ڈوبتے ہوئے مدد کے لیے چیخ چلا رہا تھا، کنارے پر جاتے ہوئے ایک صاحب نے اسے ملامت کرنا شروع کر دیا، کہا کہ اگر تیرنا نہیں جانتے تھے تو نہر کے قریب کیوں گئے تھے؟ اس نے آواز دی کہ میرے بھائی پہلے مجھے ڈوبنے سے بچاؤ پھر جتنا چاہے کوس لینا۔

السلام علیکم! یہ وقت باہمی اختلافات کو بالائے طاق رکھتے ہوئے لوگوں کی راہنمائی اور خدمت و حفاظت کرنے کا ہے۔ اللہ تعالیٰ ہم سب کو اس کی توفیق سے نوازیں، آمین ثم آمین یا رب العالمین۔