ٹویٹس

یہ آٹھ دس سال جو آپ کو پڑھنے کے لیے ملے ہیں ان کو غنیمت سمجھیں اور پڑھائی کے علاوہ اور کاموں کی طرف دھیان نہ دیں۔ باقی کاموں کے لیے ساری زندگی پڑی ہے، یہ دور آپ کا تعلم کا دور ہے، سیکھنے کا دور ہے، تربیت کا دور ہے اور تیاری کا دور ہے۔ ان اوقات کو انہی کاموں میں صرف کریں اور یاد رکھیں کہ اس دوران اگر کوئی کمی رہ گئی تو وہ ساری زندگی اسی طرح رہے گی، نہ اس کمی کو دور کرنے کا موقع ملے گا اور نہ ہی اس کے لیے آپ کے پاس فرصت ہو گی۔

میں اپنا ذاتی تجربہ عرض کرنا چاہتا ہوں کہ میں نے بحمد اللہ تعالیٰ آٹھ دس سال مدرسہ کے ماحول میں گزارے ہیں، اس دور میں وفاق کی درجہ بندی ہمارے ہاں نہیں ہوتی تھی اور کتابوں کی ترتیب سے ہی پڑھا جاتا تھا۔ میں کسی جھجھک کے بغیر آپ سے عرض کرتا ہوں کہ جن فنون میں دورانِ تعلیم کمزوری رہ گئی ہے بخدا چالیس سالہ تدریسی دور میں بھی اسے ختم نہیں کر سکا۔ نہ مصروفیات میں سے اس کے لیے وقت نکل سکا ہے اور نہ ہی اس کے مواقع میسر آتے ہیں۔ اس لیے طلبہ سے عرض ہے کہ اس تعلیمی دورانیہ کو پوری توجہ اور ہمت و صبر کے ساتھ تعلیمی محنت میں صرف کریں تاکہ صحیح ’’مُلا‘‘ بن کر دین و قوم کی صحیح خدمت کر سکیں،۔ (دارالعلوم مدنیہ، ماڈل ٹاؤن، بہاولپور ۔ ۹ جنوری ۲۰۱۱ء)

پارلیمنٹ کے منظور کردہ وقف املاک قانون کو دینی جماعتیں اور مدارس کے وفاق جس ہلکے پھلکے انداز میں لے رہے ہیں اس کا مطلب یہ ہے کہ یا تو وہ اس کا پوری طرح ادراک نہیں کر پائے یا پھر ذہنی طور پر ۱۸۵۷ء کے بعد والی صورتحال کو ایک بار پھر قبول کرنے کے لیے تیار ہیں۔ ’’آگے آگے دیکھیے ہوتا ہے کیا‘‘

اسلامی نظریاتی کونسل کے چیئرمین ڈاکٹر قبلہ ایاز صاحب کا یہ بیان خصوصی توجہ کا مستحق ہے کہ مقدس شخصیات کے ناموس کے تحفظ کے لیے قانون سازی اور پارلیمنٹ کے منظور کردہ وقف املاک قانون کا جائزہ لیا جا رہا ہے۔ ڈاکٹر صاحب کے بیان کا خیرمقدم کرتے ہوئے دینی حلقوں، علمی مراکز اور اصحابِ فکر و دانش سے گزارش ہے کہ وہ ان دونوں معاملات میں سنجیدگی کے ساتھ اپنی آرا اور تجاویز پیش کریں اور اجتماعی موقف کا اہتمام کریں، یہ وقت کا اہم ترین ملی تقاضا ہے۔

مولانا ڈاکٹر محمد عادل خان کی شہادت کی المناک خبر پورے ملک کے اہل دین کے لیے صدمہ و رنج کا باعث ہے، انا للہ و انا الیہ راجعون۔ وہ ہماری دینی قیادت کا ابھرتا ہوا روشن ستارہ تھے جن سے علماء کرام اور دینی کارکنوں کی بہت سی امیدیں وابستہ تھیں، اللہ تعالٰی ان کے درجات جنت میں بلند فرمائیں، آمین۔

اپوزیشن کے متحدہ محاذ کی قیادت مولانا فضل الرحمان کے سپرد ہونے پر امریکی حکمرانوں کی طرف سے تحفظات کے اظہار کا مطلب یہ ہے کہ اب امریکہ ہماری سیاسی جماعتوں کی قیادتیں بھی اپنی مرضی کی مسلط کرنا چاہتا ہے، جو ہماری مسلسل فدویانہ پالیسیوں کا منطقی نتیجہ ہے، اس کا جائزہ اب لینا ہی ہو گا۔

برطانیہ کے معروف نومسلم دانشور ڈاکٹر یحییٰ برٹ نے ایک موقع پر لندن میں ورلڈ اسلامک فورم کے سیمینار سے خطاب کرتے ہوئے کہا تھا کہ مغرب کو اسلام کی دعوت دینے کے لیے شاہ ولی اللہ محدث دہلویؒ کی زبان میں بات کرنا ہو گی جو روایت، درایت اور وجدانیات کے متوازن امتزاج سے عبارت ہے۔

عسکری قیادت نے چند روز قبل واضح کیا تھا کہ فوج کا سیاست سے کوئی تعلق نہیں ہے۔ جبکہ میاں نواز شریف صاحب کا کہنا ہے کہ ان کا مقابلہ وزیر اعظم سے نہیں، انہیں لانے والوں سے ہے۔ اس کے بعد وزیراعظم کا یہ ارشاد سامنے آیا ہے کہ اپوزیشن کا معاملہ فوج کے ساتھ ہے۔ میں یہ سمجھنے کی کوشش کر رہا ہوں کہ وزیر اعظم کس کی تائید فرما رہے ہیں؟ کیا کوئی دوست راہنمائی فرما سکیں گے؟

سوسائٹی کے مستحق، معذور، اور نادار افراد کی ضروریات کا خیال رکھنے اور ان پر خرچ کرنے کی روایت شروع سے چلی آ رہی ہے۔ مگر اسلام نے زکوٰۃ کے عنوان سے اسے فرض قرار دیا ہے، اسے ضرورتمندوں کا حق بتایا ہے، اس کی کم از کم حد مقرر کی ہے، اور ادا نہ کرنے کو جرم کہا ہے۔

افغان راہنما جناب عبداللہ عبداللہ نے گزشتہ روز اسلام آباد میں پاکستان کے سرکردہ علماء کرام سے ملاقات کے دوران مختلف امور پر اظہار خیال کیا ہے۔ وہ ان دنوں ’’امارت اسلامیہ افغانستان‘‘ کے ساتھ مذاکرات کے لیے سرگرم عمل ہیں۔ ان مذاکرات کی ضرورت و اہمیت سے انکار نہیں بشرطیکہ ان کا مقصد افغانستان کی خودمختاری کے ساتھ جہاد افغانستان کے منطقی تقاضوں کی تکمیل اور افغان قوم کی ملی حمیت اور اسلامی تشخص کی پاسداری ہو۔ ورنہ وقت اور صلاحیتوں کے ضیاع کے سوا کچھ حاصل ہوتا نظر نہیں آتا۔

۱۸۵۷ء کے بعد ہمارے ہاں دینی تعلیم کے نظام کا بیشتر حصہ مسجد کی چٹائیوں، محلہ کی روٹیوں اور اساتذہ کی بے لوث تدریسی خدمات پر چلتا رہا ہے۔ جس کی برکات و ثمرات ابھی تک روحانی اور فکری طور پر ہمارے پشتیبان ہیں۔ حالات کا رخ دیکھ کر یوں محسوس ہو رہا ہے کہ شاید ہمیں اسی دور میں واپس جانا پڑے گا۔ اصحابِ عزیمت کو اس کے لیے بہرحال ذہنی طور پر تیار رہنا چاہیے۔

مختلف مکاتب فکر کے مشترکہ علمی و فکری فورم ’’ملی مجلس شرعی پاکستان‘‘ نے وقف املاک اور اداروں کے حوالے سے پارلیمنٹ کے منظور کردہ حالیہ قانون کا وسیع تناظر میں جائزہ لینے اور مختلف مکاتب فکر کے سرکردہ رہنماؤں کے ساتھ اجتماعی مشاورت کے اہتمام کا فیصلہ کیا ہے۔ ملی مجلس شرعی پاکستان کے صدر مولانا زاہد الراشدی، سیکرٹری جنرل ڈاکٹر محمد امین، اور مولانا عبد الرؤف فاروقی نے آج لاہور میں ایک ملاقات کے دوران اس قانون کو دینی مدارس کے آزادانہ کردار کو ختم کرنے کی عالمی مہم کا حصہ قرار دیتے ہوئے دینی مدارس کے وفاقوں اور دیگر قائدین سے اس سلسلہ میں مشترکہ موقف طے کرنے کی اپیل کی ہے، اور یکم اکتوبر کو ایک اہم مشاورت کے اہتمام کا پروگرام طے کیا ہے، ان شاء اللہ تعالٰی۔

دینی مدارس کے بارے میں مغرب کا ایجنڈا ہے کہ وہ دینی تعلیم کے امتیازی کردار کی بجائے ’’قومی دھارے‘‘ کے عنوان سے اس تعلیمی سسٹم میں گم ہو جائیں جس کی بنیاد مغربی فکر و فلسفہ پر ہے۔ مگر قرآن و سنت علم و فکر کے زندہ سرچشمے ہیں جن کے سوتے کبھی خشک نہیں ہوتے، مغرب کو یہ حقیقت سامنے رکھنا ہی ہو گی۔

ہم میں سے ہر فرد، طبقے، ادارے اور حلقے کو دستور پاکستان اور قراردادِ مقاصد کے ساتھ اپنی کمٹمنٹ اور طرزعمل کا جائزہ لینا چاہیے کیونکہ اس کے بغیر ہم ملک و قوم کے لیے کوئی مؤثر کردار ادا نہیں کر پائیں گے۔

آج کے عالمی تناظر میں امن عالم کے لیے جناب نبی اکرم صلی اللہ علیہ وسلم کی سیرت طیبہ میں ہمیں کیا راہنمائی ملتی ہے اور آج کی دنیا کو امن سے روشناس کرنے کے لیے ہم آنحضرتؐ کے اسوۂ حسنہ سے کیا استفادہ کر سکتے ہیں؟

آج دنیا میں ہر طرف یہ بات کہی جا رہی ہے کہ ترقی کے لیے امن ضروری ہے، خوشحالی کے لیے امن ضروری ہے، ملکی استحکام کے لیے امن ضروری ہے ، قومی وقار کے لیے امن ضروری ہے، اور امن کے بغیر ان میں سے کوئی مقصد بھی حاصل نہیں ہو سکتا۔ یہ ساری باتیں درست ہیں اور ہم جانتے ہیں کہ امن کے بغیر نہ ترقی ممکن ہے، نہ استحکام حاصل ہو سکتا ہے اور نہ ہی قومی وقار قائم ہو سکتا ہے۔ لیکن سوال یہ ہے کہ ان سب کاموں کے لیے تو امن ضروری ہے مگر امن کے لیے کیا چیز ضروری ہے؟ میں اصحاب فکر و دانش کو دعوت دینا چاہتا ہوں کہ وہ اس بات پر سنجیدگی سے غور کریں کہ امن کیسے قائم ہو سکتا ہے اور امن کے لیے کیا ضروری ہے؟

میں یہ عرض کرتا ہوں کہ امن کے لیے انصاف ضروری ہے اس لیے کہ انصاف کے بغیر کسی بھی سطح پر امن کا قیام نہیں ہو سکتا، انصاف ہوگا تو امن ہوگا اور اگر انصاف نہیں ہوگا تو امن کسی قیمت پر قائم نہیں ہو سکے گا۔ کسی شہر کی بات ہو یا ملک و قوم کا معاملہ ہو، اقوام عالم کے باہمی روابط ہوں یا امن عالم کی بات ہو، ہر دائرہ میں اور ہر سطح پر اصول یہی ہے کہ انصاف ہوگا تو امن ہوگا ورنہ امن کا خواب پورا نہیں ہو سکے گا۔

انصاف کے تقاضوں میں سے ایک بڑا تقاضا یہ ہوتا ہے کہ قانون سب کے لیے یکساں ہو اور قانون کے نفاذ میں کسی فرد یا طبقے کو تحفظ اور استثنا حاصل نہ ہو اور جناب نبی اکرم صلی اللہ علیہ وسلم نے اس کی طرف بطور خاص توجہ دلائی ہے۔ فاطمہ مخزومیہ کا واقعہ مشہور ہے کہ بنو مخزوم کی خاتون فاطمہ نے چوری کی، جرم ثابت ہوگیا اور آنحضرتؒ نے اس کا ہاتھ کاٹنے کا حکم صادر فرما دیا۔ اس پر خاندان والوں کو تشویش ہوئی کہ اس سے پورے خاندان کی بے عزتی ہوگی، فاطمہ کا ہاتھ کٹا تو بنو مخزوم جیسے خاندان کی ناک کٹ جائے گی، اس لیے جناب نبی کریمؐ سے سفارش کرنے کا فیصلہ کیا گیا اور سفارش کے لیے حضرت اسامہ بن زیدؓ کا انتخاب کیا گیا جن کے بارے میں کہا جاتا ہے کہ ’’کان حب رسول اللہ صلی اللہ علیہ وسلم‘‘ وہ نبی اکرمؐ کے چہیتے نوجوان تھے، منہ بولے بیٹے کے بیٹے تھے، حضورؐ کی گود میں پرورش پائی تھی اور آپؐ کی خصوصی شفقتیں سمیٹنے والوں میں سے تھے۔ حضرت اسامہؓ نے جناب نبی اکرمؐ کی خدمت میں سفارش کی تو آپؐ نے سخت غصہ اور ناراضگی کا اظہار فرمایا اور ڈانٹ دیا کہ ’’اتشفع فی حد من حدود اللہ؟‘‘ کیا اللہ تعالٰی کی حدود کے بارے میں سفارش کر رہے ہو؟ اس موقع پر آنحضرتؐ نے وہ تاریخی جملہ ارشاد فرمایا کہ خدا کی قسم اگر میری بیٹی فاطمہ بھی چوری کرے تو اس کا ہاتھ بھی کاٹ دوں گا۔

بخاری شریف کی روایت کے مطابق جناب رسول اللہ صلی اللہ علیہ وسلم نے صرف اسامہ بن زیدؓ کو ڈانٹنے پر اکتفا نہیں کیا بلکہ مسجد نبویؐ میں اس مسئلہ پر عمومی خطاب بھی فرمایا اور اس خطاب میں لوگوں کو خبردار کیا کہ تم سے پہلے قومیں اس وجہ سے برباد ہوتی رہی ہیں کہ کوئی عام اور غریب شخص جرم کرتا تھا تو اس کو سزا دی جاتی تھی لیکن اگر کوئی وی آئی پی اور بڑا شخص جرم کا مرتکب ہوتا تو وہ سزا سے بچ جایا کرتا تھا۔ قانون کے نفاذ میں یہ فرق اور تفاوت قوموں کی تباہی کے اسباب میں سے ہے اور جناب نبی اکرمؐ نے اپنی امت کو اس سے خبردار کرتے ہوئے فرمایا کہ جب بھی کسی قوم اور معاشرے میں قانون کے یکساں نفاذ کا ماحول نہیں رہے گا وہاں فساد پھیلے گا اور قوم تباہی سے دوچار ہو جائے گی۔

سیال شریف کے سجادہ نشین حضرت خواجہ حمید الدین سیالویؒ کی وفات ہم سب کے لیے باعث صدمہ ہے، انا للہ و انا الیہ راجعون۔ تحریک خلافت، تحریک پاکستان، تحریک ختم نبوت، تحریک نظام مصطفٰیؐ، اور تحفظ ناموس صحابہ کرامؓ میں سیال شریف کا کردار نمایاں رہا ہے، اللہ پاک جنت الفردوس میں جگہ دیں، آمین۔

معروف محقق اور سیرت نگار ڈاکٹر یاسین مظہر صدیقی کی وفات عالم اسلام کے علمی و فکری حلقوں کے لیے گہرے صدمے کا باعث ہے، انا للہ و انا الیہ راجعون۔ وہ محققین اور ارباب دانش کے لیے راہنما اور مرجع کی حیثیت رکھتے تھے، مجھے بھی ان سے نیاز مندی حاصل رہی ہے، اللہ پاک انہیں جنت الفردوس میں جگہ دیں، آمین۔

جو وزراء جنسی درندگی کے شرمناک جرم پر سنگین سزا کے بارے میں باہمی بحث میں الجھے ہوئے ہیں وہ سب دستور کی وفاداری کا حلف اٹھا کر وزیر بنے ہیں جس میں قرآن و سنت کے احکام و قوانین کے نفاذ کی ضمانت دی گئی ہے۔ کیا یہ حضرات قرآن و سنت اور دستور پاکستان دونوں سے بے خبر ہیں؟ یہ بھی قومی المیہ ہی ہے۔

ہمارا یہ مزاج بنتا جا رہا کہ دینی جدوجہد کے کسی بھی تقاضے پر دوسروں کو متوجہ کرنے اور کوستے رہنے پر ہماری توجہ مرکوز رہتی ہے، اور جو ہم خود کر سکتے ہیں اس کی طرف دھیان نہیں ہوتا۔ اگر ہر شخص اپنے حصے کا کام کرنے کی کوشش کرے تو کسی سے شکایت کا موقع ہی نہیں رہتا، اللہ کرے کہ ہم ایسا کر سکیں۔

بانیٔ پاکستان قائد اعظم محمد علی جناحؒ کو ہم سے رخصت ہوئے سات عشرے گزر چکے ہیں مگر پاکستان کو ایک رفاہی، اسلامی اور جمہوری ریاست بنانے کے لیے ان کے اعلانات ابھی تک ہماری اسٹیبلشمنٹ کا منہ تک رہے، جو چہرے پر انگریزی کا نقاب ڈالے بدستور مغربی آقاؤں کے در پر کھڑی ہے، اس کا بھی کوئی علاج ہے؟

حضرت مولانا محمد تقی عثمانی صاحب مدظلہ کے لیے ستارہ امتیاز ہم سب کے لیے اعزاز کی بات ہے، مگر اس کے ساتھ کئی سال قبل سابق صدر جناب ممنون حسین کی طرف سے مجھے ملنے والے تمغہ امتیاز کی تصویر بھی سوشل میڈیا پر گردش کر رہی ہے اور مبارکباد کے مسلسل پیغام آ رہے ہیں، جس پر اس وضاحت کے ساتھ سب دوستوں کا شکرگزار ہوں۔

قادیانیوں کے شہری حقوق سے کوئی انکار نہیں ہے مگر کسی بھی ملک میں حقوق کا تعین وہاں کے دستور کے مطابق منتخب پارلیمنٹ کرتی ہے، جسے قادیانی سرے سے تسلیم کرنے سے انکاری ہیں۔ جب تک وہ دستور اور پارلیمنٹ کو تسلیم نہیں کرتے حقوق کا واویلا کرتے رہنے کا کوئی جواز نہیں، اسے ذہن میں رکھنا ہو گا۔

اجتہاد کا اہل کون ہے؟ از امام شافعی

قیاس (اجتہاد) کرنے کا مجاز وہی ہے جو آلاتِ قیاس کا مالک ہے۔ یعنی کتاب اللہ سے واقف ہے۔ فرائض و آداب، ناسخ و منسوخ عام و خاص، نصائح و مستحبات کا عالم ہے۔ محتمل مسائل میں سنتِ رسول اللہؐ اور اجماعِ امت سے استدلال کر سکے۔ ایسا معاملہ پیش آجائے جس کا حکم کتاب اللہ میں نہیں ہے تو سنت نبویؐ اور اجماع امت پر نظر ڈالے، یہاں بھی نہ ملے تو پہلے کتاب اللہ پر قیاس کرے، پھر سنتِ رسول اللہ پر، پھر سلف صالحین کے مسلّم قول پر جس میں اختلاف نہیں۔ کسی کے لیے روا نہیں کہ ان اصولوں سے اور ان پر قیاس سے ہٹ کر دین الٰہی میں کوئی بات کہے۔ قیاس کرنے کا منصب (حق) اسی کو ہے جو گزرے بزرگوں کے طریقوں، سلف کے اقوال، امت کے اجماع و اختلاف، اور زبانِ عرب سے بخوبی واقف ہو۔ عقلِ سلیم بھی رکھتا ہو، مشتبہ امور میں قوتِ تمیز سے کام لے سکے۔ رائے قائم کرنے میں جلدباز نہ ہو۔ مخالف کی بات سننے سے بھی انکار نہ کرتا ہو کیونکہ مخالف کی بات پر توجہ دینے میں نقصان نہیں نفع ہی ہے۔ (بحوالہ جامع بیان العلم و فضلہ لابن عبد البر الاندلسیؒ ۔ مترجم ص ۱۶۹ مطبوعہ ادارہ اسلامیات لاہور)

حضرات صحابہ کرام و اہل بیت عظام رضوان اللہ علیہم اجمعین کی عظمت و ناموس پر حرف گیری دنیا بھر کے مسلمانوں کے لیے ناقابل برداشت ہے، اس حوالے سے مسلمانوں کے صبر کو بار بار آزمانے کی بجائے ایسا کرنے والوں کو ہی اپنے مذموم طرز پر نظرثانی کرنا ہو گی اور متعلقہ اداروں کو کردار ادا کرنا ہو گا۔

وفاقی وزارت مذہبی امور نے چند سال قبل قومی علماء و مشائخ کونسل قائم کی تھی، اگر وہ موجود و قائم ہے تو اسے فرقہ وارانہ کشیدگی میں مسلسل اضافے کے موجودہ ماحول میں کردار ادا کرنا چاہیے، قومی اداروں کا ایسے مواقع پر خاموش تماشائی نہیں بن جانا چاہیے، ان کی خاموشی عوام میں مایوسی پیدا کرتی ہے۔