ٹویٹس

انتخابات میں تنہا قسمت آزمائی کرنے والی دینی جماعتوں کی نذر ؎

تمام محب وطن جماعتوں سے اپیل ہے کہ وطن عزیز کے نظریاتی تشخص، ریاستی خودمختاری، ملکی سالمیت، قومی وحدت، دستوروقانون کی بالادستی، اسلامی تعلیمات کی عملداری اور مسلم معاشرت کے تحفظ کو ترجیحات میں اولیت دیں اورانتخابی امیدواروں سے ان امور کی پاسداری کی تحریری یقین دہانی کااہتمام کریں۔

عرب حکمرانوں نے گذشتہ ایک صدی سے معاشی و سیاسی و عسکری میدانوں میں خود کو اسرائیل کے سرپرستوں کے رحم و کرم پر چھوڑ رکھا ہے، وہ اس بے بسی اور رسوائی کے ماحول میں بھی عرب قومیت کے خیمے سے نکلنے اور دنیائے اسلام کے وسیع تر تناظر میں دوستوں اور دشمنوں کا فرق کرنے کیلئے تیار نہیں ہیں۔

دین اوردنیا کی تقسیم کا ہمارے ہاں پایا جانے والا تصور درست نہیں ہے۔ اسلام دین اوردنیا دونوں کو بہتر بنانے کی تلقین کرتا ہے۔ دنیا کا کوئی بھی جائز کام نیک نیتی کیساتھ صحیح طریقے سے کیا جائے تو وہ دین ہے۔ اور دین کا کوئی بھی کام نیت کی خرابی کیساتھ انجام دیا جائے تو وہ دنیاداری ہے۔

آج ہماری معاشرتی روایات اور خاندانی اقدار میں اسلامی تعلیمات کا حصہ کم ہے اور علاقائی ثقافتوں کی نمائندگی زیادہ ہے۔ بدقسمتی سے ہم انہی علاقائی ثقافتوں کی مروجہ اقدار کو اسلامی اقدار کا نام دے کر ان کا تحفظ کرنے میں لگے ہوئے ہیں۔

غزہ میں جاری اسرائیل کی وحشیانہ جارحیت اور سنگین جنگی جرائم کے خلاف جنوبی افریقہ کا مقدمہ عالمی عدالت انصاف میں شروع ہو چکا ہے، ہر انصاف پسند کو اس موقع پر جنوبی افریقہ کے ساتھ کھڑا ہونا چاہیے۔

عام انتخابات سر پر آگئے ہیں مگر الیکشن میں حصہ لینے والی دینی جماعتوں میں کوئی باہمی رابطہ نہیں ہے، ان کے قائدین فوری مل بیٹھ کر کوئی مشترکہ ضابطۂ اخلاق ہی طے کر لیں تو بہت سے نقصان سے بچا جا سکتا ہے۔

عزیزم عمار خان نے میرا خط اور اپنا جواب نشر کر دیا جو میرے خیال میں قبل از وقت تھا، جبکہ یار لوگوں نے ’’کل اناء یترشح بما فیہ‘‘ کا سماں باندھ دیا ہے۔ ابھی مشاورت کے درجہ کی بات ہے کوئی تبدیلی ضروری ہوئی تو اگلے تعلیمی سال کی ترتیب میں اس کا اعلان کر دیا جائے گا، ان شاء اللہ تعالیٰ۔

وحدتِ امت ہماری سب سے بڑی ملی ضرورت ہے کہ عالمِ اسلام جن مسائل اور مصائب کی دلدل میں پھنسا ہوا ہے اس سے نکلنے کا اور کوئی راستہ نہیں ہے۔ اور صورتحال یہ ہے کہ ہمیں لڑانے والے ہوشیار ہیں، طاقتور ہیں، اور مسلسل متحرک ہیں۔ جبکہ وحدت کی بات کرنے والوں کی آواز کہیں مؤثر نہیں ہو پا رہی۔

مسئلہ فلسطین کے دو ریاستی حل کی بات کرنے والے یہ نہ بھولیں کہ اس کا اگلا مرحلہ مسئلہ کشمیر کے تین ریاستی حل کا فارمولا ہوگا اور ریاست جموں و کشمیر کی جغرافیائی وحدت کے موقف پر قائم رہنا کسی کے بس میں نہیں رہے گا۔

ڈنمارک کی پارلیمنٹ میں قرآن کریم کی بے حرمتی کو قابل سزا جرم قرار دینے کے قانون کی منظوری اس مسلّمہ اصول کی کامیابی ہے کہ مقدس شخصیات، مقامات اور کتابوں کی توہین آزادئ رائے نہیں بلکہ جرائم میں شمار ہوتی ہے جس پر ڈنمارک کی پارلیمنٹ شکریہ کی مستحق ہے۔

آئی ایم ایف کے تقاضے پر اسٹیٹ بینک کے بعد (۱) پاکستان براڈ کاسٹنگ کارپوریشن (۲) نیشنل ہائی وے اتھارٹی (۳) پاکستان نیشنل شپنگ کارپوریشن اور (۴) پاکستان پوسٹ آفس کو خسارے کے نام پر سرکاری کنٹرول سے آزاد کرنا ملکی مفادکا تقاضہ ہے یا آج کی ایسٹ انڈیا کمپنی کے سامنے سرتسلیم خم کرناہے؟

اقوام متحدہ اگر اپنی ہی قراردادوں اور رپورٹوں کی پاسداری نہیں کر سکتی تو اسے ’’لیگ آف نیشنز‘‘ کی طرح میدان سے ہٹ جانا چاہیئے اور انصاف کے نام پر دھاندلی کے ڈرامے بند کر دینے چاہئیں۔

الیکشن کی تاریخ کے اعلان کے بعد دینی جماعتوں کی قیادتوں کی ذمہ داری بنتی ہے کہ وہ مذہبی ووٹ کو تقسیم ہونے سے بچانے کیلئے باہم مل بیٹھ کر کوئی راستہ نکالیں۔

وزیر اعظم پاکستان کا کہنا ہے کہ اسرائیل فرعون کے نقش قدم پر چل رہا ہے اسلامی دنیا توجہ دے۔ وزیراعظم محترم سے مؤدبانہ سوال ہے کہ وہ اپنی پوزیشن بھی واضح کریں کہ ہزاروں فلسطینیوں کی شہادت اور لاکھوں افغان مہاجرین کی جبری رخصتی کے اس ماحول میں وہ کس کیمپ میں کھڑے ہیں؟

فلسطینی محصورین پر وحشیانہ کاروائیوں کے خلاف احتجاجاً اسرائیل سے اردن اور دیگر ممالک کا اپنے سفیروں کو واپس بلانے کا اعلان خوش آئند اور لائق پیروی ہے، مسلم اور عرب حکومتوں کی کم از کم یہ ذمہ داری تو بنتی ہے۔

اسرائیلی وزیراعظم کی طرف سے مصر کیلئے ایک پیشکش سامنے آئی ہے کہ وہ فلسطینی باشندوں کو قبول کرلے تو اس کے عالمی قرض کا بڑا حصہ معاف کرا دیا جائے گا۔ ہماری عرب لیگ اور اسلامی تعاون تنظیم سے گزارش ہے کہ وہ اس بارے میں غیرت مندانہ ردعمل کے اظہار کے ساتھ اپنا اصولی موقف بھی واضح کریں۔

فلسطین کے مظلوم مسلمانوں کی حمایت اور پشت پناہی کے ساتھ ساتھ ان کی بھرپور امداد بھی ضروری ہے مگر اس کیلئے فلسطینی سفارتخانہ یا کوئی مسلمہ بین الاقوامی مسلم ادارہ ہی با اعتماد اور محفوظ راستہ ہو گا۔

مقبوضہ علاقوں کی واپسی کیلئے وہاں کے باشندوں کی جدوجہد جنگِ آزادی ہوتی ہے، حماس کے معرکۂ حریت کو کوئی اور رنگ دینا حریت اور تاریخ کے ساتھ شدید نا انصافی ہو گی۔

امارت اسلامی افغانستان کی طرف سے فلسطینیوں کے موقف کی دوٹوک حمایت ملت اسلامیہ کے جذبات کی بروقت ترجمانی ہے۔ اور دیگر مسلم حکمرانوں سے ہماری گزارش ہے کہ وہ مصلحت کوشی سے گریز کرتے ہوئے مسئلہ فلسطین کے حوالے سے اپنے ملی موقف کا اعادہ کریں۔

فری سوسائٹی کا فلسفہ، جس پر مغربی تہذیب کی عمارت استوار ہے، حلال و حرام کے تمام دائرے توڑ کر جس انتہا کو پہنچ چکا ہے اس کا اندازہ مغربی ممالک کی اسمبلیوں اور عدالتوں کے فیصلوں سے کیا سکتا ہے جو ربع صدی سے مسلسل سامنے آرہے ہیں، اور افسوس یہ کہ ان کی تائید اب چرچ کی طرف سے ہو رہی ہے۔

رسول اللہ صلی اللہ علیہ وسلم کا تذکرہ نسبت اور محبت کے اظہار کیلئے ضروری ہے، برکت اور رحمت کے حصول کیلئے ضروری ہے، اور سب سے بڑھ کر راہنمائی اور اطاعت کیلئے ضروری ہے کیونکہ ایک مسلمان حضور صلی اللہ علیہ وسلم کے اسوۂ حسنہ کی پیروی کر کے ہی اللہ تعالیٰ کی رضا اور رحمتوں کا حقدار بنتا ہے۔

اس سوال سے قطع نظر کہ یہ ان کی ڈیوٹی اور اتھارٹی میں شامل ہے یا نہیں مگر آرمی چیف قومی معیشت کے حوالہ سے جو کچھ کرتے دکھائی دے رہے ہیں اس پر ان کی کامیابی کیلئے دل مسلسل دعاگو ہے۔

یہ کہنا کہ تحریک پاکستان کے قائدین نے قیام پاکستان سے قبل اپنے بیانات و خطابات میں نظریہ پاکستان اور اسلامی رفاہی ریاست کی باتیں محض مسلمانوں کی حمایت حاصل کرنے کیلئے کی تھیں، خلافِ واقعہ ہونے کے ساتھ ساتھ قائد اعظم مرحوم اور ان کے رفقاء کے بارے میں بدگمانی کا اظہار بھی ہے۔