ٹویٹس

مروجہ طریقِ انتخاب میں کسی حلقہ میں زیادہ امیدواروں کی صورت میں اکثریت کے ووٹ ہارنے والوں میں بٹ جاتے ہیں اور جیتنے والا عملاً اپنے حلقہ کی اقلیت کا نمائندہ ہوتا ہے۔ مثلاً ۱۹۷۰ء کی حکمران پارٹی کو ۳۷ فیصد ووٹ ملے تھے، ۶۳ فیصد ووٹ حاصل کرنے والی جماعتیں چند نشستیں ہی جیت سکی تھیں۔

مغرب کا المیہ یہ ہے کہ اسکے پاس آسمانی تعلیمات محفوظ ومستند حالت میں موجود نہیں ہیں۔ جو کسی حد تک موجود ہیں ان کی تعبیر وتشریح کی بنیاد دلیل واستدلال پر نہیں بلکہ پاپائی صوابدید (کیتھولک) یا پھر سوسائٹی کی اجتماعی خواہش (پروٹسٹنٹ) پر ہے، یعنی یا تو جمود ہے یا پھر بے لگام خواہشات۔

ایک دور تھا جب اردو زبان میں عربی اور فارسی الفاظ کی بہتات تھی کہ عربی ہماری دینی و تعلیمی اور فارسی دفتری و عدالتی زبان تھی۔ یہ صورت اب انگریزی زبان نے اختیار کر رکھی ہے اور وجہ وہی ہے کہ انگریزی تعلیمی، دفتری اور عدالتی زبان ہونے کے ساتھ ساتھ بین الاقوامی رابطہ کی زبان بھی ہے۔

ہماری وابستگی اسلام کے ساتھ شعوری و فکری سے کہیں زیادہ عقیدت و جذبات کی ہے۔ دینی کارکنوں سے میری گزارش ہوتی ہے کہ دنیا کے حالات کا مطالعہ کریں اور عالم اسلام کے خلاف سازشوں کا ادراک حاصل کریں، اور اپنا طرزعمل دنیوی نفع ونقصان کے ساتھ ساتھ اخروی کامیابی کے حوالے سے طے کریں۔

رسول اکرم صلی اللہ علیہ وسلم نے اپنے دور کے اسلوبِ خطابت اور شعروشاعری کو دین کے دفاع و دعوت کا ذریعہ بنایا تھا۔ آج اس بات کی شدید ضرورت ہے کہ آپؐ کی اس سنت مبارکہ کی پیروی کرتے ہوئے دین کے دفاع واشاعت کیلئے گفتگو، محاورہ، مکالمہ اور ابلاغ کے دورِحاضر کے اسلوب کو اختیار کیا جائے۔

حضرت ابوذر غفاریؓ کہتے ہیں کہ نبی ﷺ نے فرمایا، میرے پاس احد پہاڑ جتنا سونا بھی ہو تو تین دینار سے زیادہ ذخیرہ نہیں رکھوں گا سب اللہ تعالیٰ کی راہ میں خرچ کردوں گا (بخاری) حضرت عائشہؓ کہتی ہیں کہ آپؐ اگلے روز کیلئے کوئی چیز ذخیرہ نہیں رکھتے تھے سب اسی روز خرچ کردیتے تھے (ترمذی)

دنیا کے وہ تمام انصاف پسند حلقے جو عوام کی نمائندگی، منتخب حکومت، پارلیمنٹ کی خود مختاری اور رائے عامہ کے احترام کی بات کرتے ہیں، وہ اپنے ضمیر کو ٹٹولیں اور بین الاقوامی معاہدات کے نام پر اور جمہوریت کی آڑ میں قوموں کی خود مختاری کو پامال کرنے والوں کے خلاف کلمۂ حق بلند کریں۔

اپنے بزرگوں کو یاد رکھنا اور ان کی خدمات و قربانیوں سے آنے والی نسلوں کو باخبر کرتے رہنا زندہ قوموں کا شعار ہے جو ان کے مستقبل کی بہتر صورت گری کی بنیاد بنتا ہے اور اس سے قوموں کے امتیازات کا تسلسل بھی قائم رہتا ہے۔

اجتہاد اور تعبیرشریعت کا اختیار ایک ایسے ادارے کیلئے طلب کرنے کا کیا مقصد ہے جسکی رکنیت کیلئے علمی وتجرباتی اہلیت تو کجا قرآن کریم ناظرہ پڑھ سکنا بھی شرط نہیں ہے؟ اس کیلئے ضروری ہے کہ پارلیمنٹ کی رکنیت کیلئے اتنی علمی اہلیت واستعداد کو شرط قرار دیا جائے جو اس مقصد کیلئے ناگزیر ہے۔

نسل، زبان، علاقہ اور قومیت کا تفاخر دورِجاہلیت کا امتیاز تھا اور اس بنیاد پر نہ صرف برتری جتائی جاتی تھی بلکہ غلبہ و تسلط قائم کرنے کی کوشش کی جاتی تھی۔ رسول اللہ ﷺ نے انہیں جاہلی عصبیت کی علامات قرار دے کر ختم کیا اور اعلان فرمایا کہ شرافت اور برتری صرف تقوٰی کی بنیاد پر ہو گی۔

جس نوجوان کو اپنی میز پر بیٹھے ہرزمانے ہرعلاقے اور ہرنوع کی معلومات حاصل کرنے کی سہولت میسرہے اسے یہ ’’فتوٰی‘‘ اپیل نہیں کرے گا کہ وہ انٹرنیٹ، ٹی وی اور اخبارات وجرائد سے دور رہے۔ اس کیلئے علماء کو خود محنت کرکے ان وسیع تر معلومات کے تناظر میں دینی راہنمائی کا اہتمام کرنا ہوگا۔

متحدہ ہندوستان میں برطانوی راج سے قبل ہزاروں دینی مدارس قائم تھے جو محض اوقاف کے قوانین میں تبدیلی کی وجہ سے کسی مداخلت اور قبضہ کے بغیر بند ہو گئے تھے۔ اوقاف کے قوانین میں نئی تبدیلیوں کا اس حوالہ سے جائزہ لینا بھی ضروری ہے جو ارباب فکر و دانش کی اہم ذمہ داری ہے۔

عربی زبان قرآن و حدیث کی زبان ہے اور ایک مسلمان کیلئے اس کی تعلیم اساسی حیثیت رکھتی ہے مگر ہمارے ہاں قیام پاکستان کے بعد سے ہی اسے وہ درجہ نہیں دیا جا رہا ہے جو اس کا حق ہونے کے ساتھ ساتھ مسلم معاشرے کی بنیادی ضرورت بھی ہے۔

بخاری شریف کے ابواب کی فہرست ایک نظر دیکھنے سے معلوم ہوتا ہے کہ انسانی زندگی کا کوئی شعبہ ایسا نہیں جس کے بارے میں امام بخاریؒ نے عنوان قائم نہیں کیا اور پھر اس کیلئے آیات قرآنی اور ارشادات نبویؐ پیش نہیں کیے۔ اس جامعیت کی وجہ سے بھی بخاری شریف کو ’’الجامع الصحیح‘‘ کہا جاتا ہے۔

دینی مدارس مفت تعلیم دینے کے ساتھ معاشرہ کے نادار طبقات کے افراد کو رہائش، خوراک، لباس اور علاج کی سہولتیں بھی بلامعاوضہ فراہم کرتے ہیں جس کا اعتراف حکمران طبقہ کے سرکردہ حضرات کی طرف سے بارہا ہو چکا ہے مگر مدارس پر محکموں اور اداروں کے دباؤ سلسلہ کسی نہ کسی بہانے جاری رہتا ہے۔

سادگی، قناعت اور جفاکشی، یہ صرف ہمارے تصوف کے موضوعات نہیں بلکہ سیاست کے بنیادی ستون بھی ہیں۔ یہ شاہانہ ایوانوں میں خطیر رقوم کے خرچ سے اجتماعات کر کے ان عنوانات پر دلکش تقریریں کرنے کا نام نہیں ہے بلکہ ہماری قومی ضرورت ان اصولوں کو ذاتی و اجتماعی زندگی میں عملاً نافذ کرنے کی ہے۔

عالمِ اسلام کے دینی حلقے اس بات کیلئے تیار نہیں ہیں کہ اسلام کی جن باتوں پر مغرب والوں کو اعتراض ہے ان کی کوئی نئی تعبیر و تشریح کر کے انہیں مطمئن کیا جائے۔ بلکہ وہ اسلامی احکام و قوانین اور روایات و تعلیمات پر قائم ہیں جن پر امت چودہ سو سال سے اجتماعی طور پر کاربند چلی آرہی ہے۔

امریکی خلائی تحقیقاتی مرکز ناسا کی سیر کے دوران ایک ساتھی نے بتایا کہ ہارورڈ یونیورسٹی کے ایک یہودی پروفیسر نے اپنی ویب سائٹ پر کہا ہے کہ فقہاء اسلام نے معذور کی نماز کا جو طریقہ لکھا ہے وہی ان مسلم خلابازوں کیلئے بھی ہونا چاہیے کہ اپنے حالات وظروف کے مطابق جس طرح ہو سکے پڑھ لیں۔

ام المومنین حضرت عائشہ رضی اللہ عنہا فرماتی ہیں کہ جناب رسول اللہ ﷺ کو انسانی خصال میں سب سے زیادہ نفرت جھوٹ سے تھی (بیہقی)۔ اور اپنے خاندان کے کسی شخص کے بارے میں جھوٹ کی کسی بات پر مطلع ہوتے تو اس سے اس وقت تک اعراض فرماتے تھے جب تک اس کی توبہ مشاہدے میں نہ آجاتی (مسند احمد)۔

قرآن کریم پر ایمان لانے کے بعد حدیث پر ایمان لانا کیوں ضروری ہے؟ اس سوال کے جواب میں میری گزارش ہوتی ہے کہ قرآن کریم کے بعد نہیں بلکہ اس سے پہلے حدیث پر ایمان لانا ضروری ہے کیونکہ حدیث کو مانیں گے تو قرآن کریم تک رسائی ہوگی ورنہ قرآن کریم کی کسی آیت پر ایمان لانا ممکن ہی نہیں ہے۔

یہودی انبیاءؑ کی اولاد ہونے کے ناطے خود کو احتساب سے مستثنٰی سمجھتے ہیں، عیسائیوں کے مطابق حضرت عیسٰیؑ نسل انسانی کے گناہوں کا کفارہ دے گئے ہیں، مذہب نہ ماننے والے آخرت کا تصور ہی نہیں رکھتے۔ یہ اسلام کا عقیدہ ہے جو عمل کی بنیاد پر سزا وجزا کا تصور دے کر انسان کو جرم سے روکتا ہے۔

امیر شریعت حضرت مولانا سید عطاء اللہ شاہ بخاری رحمۃ اللہ علیہ کے فرزند حضرت مولانا سید عطاء المہیمن بخاری کی وفات دینی حلقوں کے لئے گہرے صدمے اور رنج کا باعث ہے، انا للہ و انا الیہ راجعون۔ اللہ تعالٰی مغفرت فرمائیں اور تمام متعلقین کو صبر جمیل عطا فرمائیں، آمین یا رب العالمین۔

فقہ حنفی شخصی فقہ نہیں بلکہ مشاورتی و اجتماعی فقہ ہے جو ایک باقاعدہ مجلسِ علمی میں اجتماعی استنباط و استخراج اور باہمی اختلاف رائے کے ساتھ کسی نتیجے تک پہنچنے کی مبارک علمی مساعی پر مشتمل ہے۔ یہ اسلام کے قانونی نظام کی بہت بڑی خدمت اور امام اعظم ابوحنیفہؒ کا عظیم علمی کارنامہ ہے۔

عربی زبان کی تعلیم کے حوالے سے سینٹ کا پاس کردہ بل خوش آئند ہے۔ اردو قومی زبان اور عربی دینی زبان کے طور پر ہماری ناگزیر ملی ضرورت ہے مگر ان کو صحیح مقام دلانے کے لئے انگریزی کی مرعوبیت سے نجات حاصل کرنے کی ضرورت ہے۔ ؏ ’’کچھ علاج اس کا بھی اے چارہ گراں ہے کہ نہیں‘‘