ٹویٹس

حضرت مولانا مفتی محمد تقی عثمانی نے کشمیر کی زمین ہندوؤں پر فروخت کرنے کو شرعاً ناجائز قرار دے کر علماء امت کی طرف سے فرض کفایہ ادا کیا ہے، اور اکابر کے اس فتویٰ کی یاد تازہ کر دی ہے جس میں فلسطین کی زمین کو یہودیوں پر فروخت کرنے کو ناجائز قرار دیا گیا تھا، اللہ پاک جزائے خیر سے نوازیں، آمین۔

رسول اکرم صلی اللہ علیہ وسلم کو بعثت کے بعد عربی، فارسی، رومی اور مصری تہذیبوں سے عملی سابقہ درپیش تھا، جن پر اسلام نے خلافت راشدہ کے دور میں غلبہ حاصل کر لیا تھا۔ سوال یہ ہے کہ ان تہذیبوں کی تمام قدریں مسترد کر دی گئی تھیں یا ’’خذ ما صفا و دع ما کدر‘‘ کا اصول اختیار کیا گیا تھا؟ آج کا اہم سوال!

بین الاقوامی معاہدوں میں شریک ہونا اور ان کو ڈیل کرنا حکومتوں کا کام ہے، مگر معاہدات کے دینی و تہذیبی پہلوؤں کو ریاستی اداروں کے رحم و کرم پر نہیں چھوڑا جا سکتا، یہ بہرحال علماء کرام، دینی اداروں، اور علمی مراکز کی ذمہ داری ہے، جس سے مسلسل غفلت کا خمیازہ بار بار ہمیں بھگتنا پڑ رہا ہے۔

اسلام آباد میں ہندو مندر کی تعمیر کے بارے میں کہا جاتا ہے کہ اسلام آباد کے طے شدہ ماسٹر پلان میں اس کی گنجائش نہیں ہے، جبکہ دوسری طرف اسی ماسٹر پلان کے خلاف قرار دے کر اسلام آباد ہی کے علاقے ہمک میں مساجد شہید کرنے اور علماء کرام کو گرفتار کرنے کی خبریں گردش کر رہی ہیں، خدا خیر کرے۔

آزاد کشمیر اسمبلی میں خلفائے راشدین، صحابہ کرام، اور اہل بیت عظام رضوان اللہ علیہم اجمعین کی حرمت و تقدس کی پاسداری کے لیے سردار عتیق احمد خان کی پیش کردہ قرارداد کی منظوری پوری امت کے جذبات کی ترجمانی ہے، جس پر محرک ارکان اسمبلی اور حکومت سب شکریہ و تحسین اور مبارک باد کے مستحق ہیں۔

اسلام آباد میں ہندو مندر کی تعمیر کے سلسلہ میں اسلامی نظریاتی کونسل اور وفاقی شرعی عدالت سے رجوع کرنے کی تجویز پر کچھ دوستوں کو اشکال ہے۔ گزارش ہے کہ اگر صرف جذبات اور غصے کا اظہار کرتے رہنا ہے تو ٹھیک ہے، لیکن اگر اسے روکنا یا شرائط کا پابند کرنا ہے تو قانون کا راستہ ہی اپنانا ہوگا۔

ترکی کا اقوام متحدہ کی جنرل اسمبلی رواں سال کے سیشن کی صدارت سنبھالنا اگرچہ صرف ایک اعزازی منصب ہے، مگر عالمی سطح پر ملت اسلامیہ کے جذبات و مفادات کی حوصلہ اور جرأت کے ساتھ ترجمانی کے باعث خوشی کی بات بھی ہے۔ اللہ پاک اس اعزاز کو حقیقت میں بدل دیں تو ان کے لیے کوئی مشکل نہیں ہے، آمین۔

کرونا بحران کے دوران دیگر جانی و مالی نقصانات اپنی جگہ بڑے رنج و صدمہ کا باعث ہیں مگر سرکردہ علماء کرام کی یکے بعد دیگرے وفات نے صدمات کی شدت میں کئی گنا اضافہ کر دیا ہے، انا للہ و انا الیہ راجعون۔ علامہ ڈاکٹر خالد محمودؒ، مولانا مفتی سعید احمد پالنپوریؒ، مولانا یحیٰی محسنؒ، مولانا شاہ عبد العزیزؒ، مولانا عبد الرؤف اسلام آبادیؒ، مولانا عبید الرحمان ضیاءؒ، مولانا شمس الدین انصاریؒ بہاولپور، مولانا قاری تصور الحق مدنیؒ، مولانا مفتی محمد نعیمؒ، محترم حافظ صغیر احمدؒ لاہور، خواجہ عزیز احمد بہلویؒ، محترم ڈاکٹر عبد المقیم لاہور، مولانا غلام محمد سیالویؒ، مولانا عبد الحمید ہزارویؒ گوجرانوالہ، مولانا پیر عزیز الرحمان ہزارویؒ، مولانا پیر محمد ظاہر بکوٹیؒ، اور دیگر بہت سے اہل علم و فضل کی جدائی نے قیامت سے پہلے اس کی جھلک دکھا دی ہے۔

تفصیلی تذکرہ و تعزیت ان میں سے ہر بزرگ کا حق ہے مگر دل گرفتگی اور شدت غم کی وجہ سے حوصلہ ساتھ نہیں دے رہا جبکہ طبیعت کی ناسازی اور حالات کی ناسازگاری کے ماحول میں کہیں آنے جانے کی ہمت بھی نہیں ہے۔ اس لیے اس مختصر پیغام کے ذریعے ان بزرگوں کے متوسلین، خاندانوں اور متعلقین کے ساتھ تعزیت و رنج کے اظہار کے ساتھ دعاگو ہوں کہ اللہ رب العزت جانے والے سب بزرگوں کو جوار رحمت میں جگہ دیں اور جملہ پسماندگان کو صبر و حوصلہ کے ساتھ اس صدمہ کو برداشت کرنے اور اپنے بزرگوں کی حسنات کا سلسلہ جاری رکھنے کی توفیق سے نوازیں۔ جو بزرگ اور احباب موجود ہیں اللہ تعالٰی انہیں صحت و عافیت کے ساتھ تادیر سلامت رکھیں۔

اللہ رب العزت کرونا کے تمام متاثرین، مریضوں اور دیگر سب بیماروں کو صحت کاملہ سے بہرہ ور فرمائیں اور ہم سب کو خیر کی زندگی اور ایمان پر خاتمہ نصیب فرمائیں۔ اللھم ارفع عنا الوباء والبلاء واحفظنا من کل شر و مرض، آمین یا رب العالمین۔

اپنی جانوں کو خطرہ میں ڈال کر کرونا کے مریضوں اور متاثرین کی خدمت کرنے والے ڈاکٹر صاحبان اور دیگر میڈیکل ورکرز لائق صد تحسین اور شکریہ کے مستحق ہیں۔ چند افراد کی کوتاہیوں کی وجہ سے سب کو مورد الزام ٹھہرانا درست نہیں ہے، اس کا خیال رکھنا ضروری ہے، اللہ پاک سب کو عافیت سے نوازیں، آمین۔

قاضی فائز عیسیٰ کیس میں سپریم کورٹ کے فیصلے پر محب وطن حلقوں کی طرف سے اطمینان کا اظہار قوم کے اجتماعی ضمیر کی زندگی کی علامت ہے، جو ہماری ایک اہم ملی ضرورت ہے۔ اللہ پاک عدالت عظمٰی کو اس کی مسلسل نمائندگی کرتے رہنے کی توفیق سے نوازیں، آمین یا رب العالمین۔

قومی اسمبلی میں وزیر خارجہ شاہ محمود قریشی کا یہ اعلان قوم کے جذبات اور موقف کی ترجمانی ہے کہ اسرائیل کو تسلیم نہیں کیا جائے گا۔ اس کا خیر مقدم کرتے ہوئے گزارش ہے کہ مظلوم کشمیریوں اور فلسطینیوں کی دادرسی کے لیے عالمی سطح پر مؤثر جدوجہد بھی ہماری ملی ذمہ داری ہے، اللہ پاک توفیق دیں، آمین۔

جامعہ اسلامیہ راولپنڈی صدر کے شیخ الحدیث حضرت مولانا عبد الرؤف کی وفات ملک بھر کے اہل علم و دین کے لیے صدمہ کا باعث ہے، انا للہ و انا الیہ راجعون۔ وہ ہم سب کے بزرگ اور سرپرست تھے، اللہ تعالٰی مغفرت فرمائیں اور تمام متعلقین کو صبر جمیل کی توفیق سے نوازیں، آمین یا رب العالمین۔

حضرت شیخ الہندؒ کا ارشاد ہے کہ دینی مدارس کے قیام کا مقصد اٹھارہ سو ستاون کے نقصانات کی تلافیِ تھا۔ جو دینی، سیاسی، معاشی، تہذیبی، علمی، سب شعبوں کو محیط ہیں۔ اس جدوجہد کے لیے دینی مدارس کا آزادانہ دینی تعلیمی کردار اولین شرط ہے جس پر کوئی سمجھوتہ بنیادی مقصد کے منافی ہوگا، یہ بات یاد کو یاد رہے۔

انسان کے ذمہ صرف یہ نہیں ہے کہ وہ دنیا کی چند روزہ زندگی کو بہتر بنانے کے لیے آسائش تلاش کرے، اسباب فراہم کرے، اور ان کے بہتر سے بہتر استعمال کے طریقے دریافت کرتا رہے۔ بلکہ یہ بھی اس کی نوعی ذمہ داری میں شامل ہے کہ وہ کائنات کو وجود میں لانے والے خالق و مالک کی مرضی معلوم کرے اور اس کی مرضی و منشا کی تکمیل کے لیے متحرک ہونے کے ساتھ ساتھ اپنی آخرت کی زندگی کے لیے، جو اصلی اور دائمی حیات ہے، فکرمند ہو اور اسے بہتر بنانے کو زندگی کا مقصد قرار دے۔ انسان کا المیہ یہ ہے کہ اس نے اسی دنیا کی زندگی کو اپنا واحد مقصد بنا لیا ہے اور اس کی تمام تر تگ و دو اسی کے گرد گھومنے لگی ہے۔ اسی طرح اس کی فکرمندی ’’دنیا میں آگیا ہوں تو کچھ نہ کچھ تو کرنا ہی ہے‘‘ کے دائرے میں محصور ہے۔ جبکہ ’’کیوں آیا ہوں؟ کس نے بھیجا ہے؟ آگے کہاں جانا ہے؟‘‘ کے بنیادی سوالات اس کی نظروں سے اوجھل ہو کر رہ گئے ہیں جسے قرآن کریم نے ’’یعلمون ظاہرًا من الحیاۃ الدنیا‘‘ سے تعبیر فرمایا ہے۔

ناموس رسالتؐ و صحابہ کرامؓ کے تحفظ کے حوالے سے پنجاب اسمبلی نے گزشتہ روز جو قانون منظور کیا ہے وہ لائق صد تحسین و تبریک ہے۔ اسمبلی کے اسپیکر چودھری پرویز الٰہی صاحب اور تمام ارکان ہم سب کے شکریہ کے مستحق ہیں، اللہ پاک انہیں سعادت دارین سے نوازیں اور مزید پیشرفت و ترقیات سے بہرہ ور کریں، آمین۔

جس طرح لوگوں کی جسمانی خوراک و علاج کی ضروریات ان لوگوں نے ہی پوری کرنی ہیں جو ان کے لیے کام کر رہے ہیں، ان کی خامیوں اور کوتاہیوں کا واویلا کرتے رہنے سے لوگوں کی ضروریات کا بندوبست نہیں ہوگا، اسی طرح روح و نفس کی ناگزیر ضروریات کے لیے بھی ان کے لیے کام کرنے والوں کو ہی قبول کرنا ہوگا۔

(۱) حضرت مولانا صوفی عبد الحمید سواتیؒ کی اہلیہ محترمہ اور ہماری مشفقہ چچی کا آج شام انتقال ہو گیا ہے اور ہم ایک بار پھر ماں کی شفقتوں سے محروم ہوگئے ہیں، انا للہ و انا الیہ راجعون۔ احباب سے خصوصی دعاؤں کی درخواست ہے، جنازہ رات کو کسی وقت ہوگا، ان شاء اللہ تعالٰی۔

(۲) رات کو گیارہ بجے نماز جنازہ نصرت العلوم میں ادا کرنے کا مشورہ چل رہا ہے۔

امیر المومنین حضرت عمر بن عبد العزیز عالم اسلام کی مایہ ناز شخصیت ہیں، ان کی قبر کی بے حرمتی کے حالیہ شرمناک واقعہ پر پوری امت مسلمہ بے چین و مضطرب ہے۔ آج جمعۃ المبارک کے اجتماعات میں اس واقعہ کی مذمّت اور حضرت عمرؒ کی خدمات پر خراج عقیدت پیش کرنے کی ملک بھر کے علماء کرام سے گزارش ہے۔

امریکہ میں سیاہ فاموں کے ہنگامے اس کے ماضی کی صدائے بازگشت ہے۔ ۱۸۶۴ء میں صدر لنکن نے کالوں کو گوروں کی شخصی غلامی سے نجات دلائی تھی، جبکہ ۱۹۶۴ء میں صدر کینیڈی نے کالوں کو برابر کا امریکی شہری قرار دینے کا قانون منظور کیا تھا، آج امریکہ اپنے اسی ماضی کے آئینے میں جھانک رہا ہے۔

دینی مدارس کے طلبہ کے لیے وفاق المدارس العربیہ پاکستان کی قیادت نے جو ہدایات جاری کی ہیں وہ برموقع اور حالات کے تقاضوں کے مطابق ہیں، ان کی پابندی ضروری ہے ہمیں تعلیمی تسلسل کے ساتھ ساتھ اپنے نظم و وقار کا بھی ہر ممکن تحفظ کرنا ہے، ان شاء اللہ تعالیٰ۔ اللہ تعالیٰ توفیق سے نوازیں، آمین۔

حضرت علامہ غلام محمد سیالوی ملک کی بڑی علمی و دینی شخصیت تھے، جنہوں نے زندگی بھر دین کی سربلندی و فروغ کے لیے محنت کی اور قوم کی راہنمائی کرتے رہے، ان کی وفات علمی حلقوں کے لیے صدمہ و رنج کا باعث ہے، اللہ تعالٰی مغفرت فرمائیں اور تمام متعلقین کو صبر جمیل کی توفیق سے نوازیں، آمین۔

دین، دینی حلقوں و مراکز اور دین کے معاشرتی کردار کے بارے میں موجودہ صورتحال کو سمجھنے کے لیے امریکی تھنک ٹینک رینڈ کارپوریشن کی متعلقہ رپورٹ کو ایک بار پھر پڑھنا ضروری ہے تاکہ سنجیدہ دینی حلقے اپنی حکمت عملی کا ازسرنو صحیح طور پر تعین کر سکیں۔

بعض دوستوں نے پوچھا ہے کہ نوآبادیاتی نظام سے کیا مراد ہے؟ گزارش ہے کہ جو ملک اپنے فیصلوں اور پالیسیوں میں مسلسل بیرونی مداخلت اور دباؤ کا شکار رہتا ہے وہ نوآبادیاتی نظام کے شکنجے میں ہے، جس سے نجات حاصل کرنا ضروری ہے، چہ جائیکہ کہ دینی معاملات کو بھی اس کے رحم و کرم پر چھوڑ دیا جائے۔

مولانا مفتی منیب الرحمان دینی قیادت کی محترم شخصیت اور فواد چودھری وفاقی حکومت کا اہم حصہ ہیں۔ دونوں کو ایک دوسرے کے مقام و منصب کا لحاظ رکھنا چاہیے اور فواد چودھری کو دستوری ادارے مرکزی رؤیت ہلال کمیٹی کے خلاف محاذ آرائی کر کے اپنے حلف سے انحراف نہیں کرنا چاہیے۔