ٹویٹس

قانون کی بالادستی کا تحفظ، امن و امان کا قیام، اور امورِ نظم و نسق کی انجام دہی ملکی انتظامیہ کے فرائض میں شامل ہے۔ ان ذمہ داریوں کی درست ادائیگی کے لیے ضروری ہے کہ وہ سیاسی وفاداریوں سے لاتعلق ہو کر اپنے کام سے کام رکھے اور خلافِ قانون واقعات پر بلاجھجھک اقدامات کرے۔

آج کے ہتھیار علم، دلیل اور عوامی آگاہی ہیں، دینی رہنماؤں کو ان میں مہارت حاصل کرنے کے لیے مطالعہ و تحقیق کا ذوق بڑھانا ہو گا اور رائے عامہ کا اعتماد حاصل کرنے کے لیے روایتی ڈگر سے ہٹ کر وسیع تر عوامی تعلقات کا ماحول قائم کرنا ہو گا۔

اگر سعودی عرب کے ملکی نظم و نسق میں عوام کو شریک کرنے اور عوامی نمائندوں کے چناؤ کا کوئی نظام بنایا جاتا ہے تو یہ اسلامی اصولوں سے انحراف نہیں ہو گا بلکہ ان اعلیٰ اصولوں اور اقدار کی طرف واپسی کا عمل ہو گا جس کی وضاحت حضرت عمر رضی اللہ عنہ نے اپنے آخری خطبہ جمعہ میں فرمائی تھی۔

اسلامی بینکاری کی مروجہ صورت کو سودی نظامِ معیشت کی دلدل سے نکلنے کا ایک راستہ اور اصلاحِ احوال کی بتدریج محنت کا ایک ضروری مرحلہ تصور کیا جا سکتا ہے، اس لیے کہ دلدل سے نکلنے کے لیے بہرحال اسی میں سے گزرنا ہوتا ہے، چنانچہ اسے مثالی صورت اور آخری منزل سمجھنا درست نہ ہو گا۔

نبی کریم ﷺ نے اجتماعی کفالت کا ایسا نظام متعارف کرایا کہ کسی مستحق کی ضرورت رکتی نہیں تھی، اور یہ بعد میں بیت المال کے عنوان سے سرکاری محکمہ کی صورت اختیار کر گیا تھا۔ آج بھی یہ نظم اپنی اصل روح کے ساتھ واپس آ جائے تو انشورنس کے کسی سسٹم کی ضرورت باقی نہیں رہ جاتی۔

یہ بات مضحکہ خیز ہے کہ دینی مدارس دین کے علاوہ اور شعبوں کی تعلیم نہیں دیتے اس لیے وہ ’’قومی دھارے‘‘ سے الگ ہیں۔ اس منطق کے مطابق تو میڈیکل، انجینئرنگ اور لاء وغیرہ کی تعلیم دینے والے ادارے بھی قومی دھارے سے خارج قرار پائیں گے کہ وہ دیگر قومی شعبوں کی تعلیم اپنے ذمے نہیں لیتے۔

انبیاء کرام علیہم السلام انسانی معاشرہ کو اللہ تعالیٰ کے احکام کے تحت زندگی بسر کرنے کی دعوت دینے آتے رہے اور قرآن کریم کے ارشادات کے مطابق انہوں نے صرف عقیدہ اور عبادت کی بات نہیں کی بلکہ اس کے ساتھ انسانی سماج کے مسائل کا حل پیش کیا اور اجتماعی خرابیوں کی اصلاح بھی کی۔

نبی ﷺ نے توحید کی دعوت دی تو پہلا ردعمل تحقیرواستہزاء اورطعن واعتراض کا تھا، اس سے دعوت دین کا راستہ نہ رکا تو حضورؐ اور اصحابؓ کوایک عشرہ کرب واذیت کا سامنا کرنا پڑا، اس میں بھی ناکامی ہوئی تو سودے بازی کا حربہ سامنے آیا جسے قرآن کریم نے ’’ودوا لو تدھن فیدھنون‘‘ سے تعبیرکیا ہے۔

اسلام نے مرد اورعورت کے میل جول کے ضابطے متعین کیے ہیں جنہیں ملحوظ رکھتے ہوئے مرد کی طرح عورت بھی ملازمت، کاروبار اور کمائی کے دیگرجائزذرائع اختیار کرسکتی ہے۔ البتہ فطرتِ سلیمہ نے جو امتیازات مرد اورعورت کے درمیان رکھے ہیں، مساوات کے نام پر ان کی نفی کرنا دانشمندی کی بات نہیں ہے۔

دنیا بھر میں امریکہ کی سرگرمیاں اب زیادہ مخفی نہیں رہیں اور اس پر اسے جس طعن و تشنیع کا سامنا کرنا پڑتا ہے وہ بھی کوئی پوشیدہ بات نہیں ہے۔ اس کے باوجود امریکی قیادت کا کہنا ہے کہ کسی مخالفت اور طعنہ زنی کی پروا کیے بغیر امریکہ اور امریکی قوم کی خاطر وہ کچھ بھی کر سکتے ہیں۔

کچھ عرصہ سے آنکھوں میں تکلیف اور نظر کی کمزوری کے باعث لکھنے پڑھنے میں دشواری کا سامنا ہے۔ راولپنڈی کے معروف آئی اسپیشلسٹ میجر جنرل (ر) ڈاکٹر مظہر اسحاق نے گزشتہ روز معائنہ کے بعد مسلسل تین ماہ تک علاج اور اس کے بعد آپریشن کا امکان ظاہر کیا ہے۔ احباب سے دعاؤں کی درخواست ہے۔

نبی اکرم ﷺ نے حجۃ الوداع کے موقع پر مختلف اقوام و اوطان اور رنگ و نسل کے تقریباً ڈیڑھ لاکھ افراد پر مشتمل بین الاقوامی اجتماع میں کالے و گورے اور عربی و عجمی کے امتیازات ختم کرنے کا اعلان کر کے نسلِ انسانی کو عالمگیریت (Globalization) کے فطری اور دائمی اصولوں سے متعارف کرایا۔

تاتاریوں کے حملوں سے مسلم حکومتیں کمزورہوئیں تو شام کے حکمران الملک الاشرف نے شیخ الاسلام عزالدین سے رجوع کیا۔ انہوں نے کہا کہ اہلکاران حکومت رنگ رلیوں میں مگن ہیں، ٹیکس بڑھتے جا رہے ہیں، شراب نوشی اوردیگر گناہ عام ہو رہے ہیں، اس وقت آپ کا سب سے افضل عمل ان گندگیوں کو دورکرنا ہے۔

علم انسان کا وہ امتیاز ہے جس نے انہیں فرشتوں پر فضیلت عطا کی اور استاذ وہ منصب ہے جسے حضرت محمد ﷺ نے یہ فرما کر اپنے تعارف کے طور پر پیش کیا کہ ’’انما بعثت معلما‘‘ میں معلم بنا کر بھیجا گیا ہوں جبکہ رسول اکرمؐ پر نازل ہونے والی پہلی وحی قراءت، قلم اور تعلیم کے تذکرہ پر مشتمل ہے۔

پاکستان اور تاجکستان نے مشترکہ موقف اختیار کیا ہے کہ افغانستان سے امریکی انخلاء سے قبل سیاسی سمجھوتا ضروری ہے۔ ہمیں اس سے انکار نہیں ہے لیکن یہ سمجھوتا افغانستان کی وحدت، قومی خودمختاری اور اسلامی شناخت کی قیمت پر قابل قبول نہیں ہو گا۔

قائد اعظم کا ارشاد ہے کہ ’’میں زمینداروں اور سرمایہ داروں کو متنبہ کرتا ہوں کہ وہ ایک ایسے فتنہ انگیز ابلیسی نظام کی رو سے، جو انسان کو بدمست کردیتا ہے کہ وہ کسی معقول بات کوسننے پرآمادہ نہیں ہوتا، عوام کے گاڑھے پسینے کی کمائی پررنگ رلیاں مناتے ہیں‘‘ (سالانہ اجلاس مسلم لیگ ۱۹۴۳ء)

یہ امر واقعہ ہے کہ جس عقلِ عام (کامن سینس) کو عالمی معیار قرار دے کر دنیا سے منوانے کی کوشش کی جا رہی ہے وہ صرف مغرب کی معلومات و مشاہدات اور اس کے مدرکات و محسوسات کی نمائندگی کرتی ہے، اس کے تاریخی پس منظر اور تجربات کا ماحول باقی دنیا سے مطابقت نہیں رکھتا۔

سابق امریکی صدرجمی کارٹر اپنی کتاب ’’امریکہ کا اخلاقی بحران‘‘ میں لکھتے ہیں کہ جب امریکیوں سے پوچھا جائے کہ کیا ان کے نزدیک ہم جنس پرست مردوں اورعورتوں کا اپنی ہی صنف کے افراد کے ساتھ جنسی عمل کرنا قابل قبول ہے، تو اکثریت اثبات میں جواب دیتی ہے، اب سے دوعشرے قبل تک ایسا نہیں تھا۔

قائد اعظم محمد علی جناح مرحوم کے مطابق اسرائیل ایک ناجائز ریاست اور مسلمانوں کے دل میں خنجر کی طرح ہے۔ یہی ملت اسلامیہ کی رائے عامہ کا اجتماعی موقف چلا آرہا ہے، لیکن اقوام متحدہ نے آدھے فلسطین کو بطور اسرائیل ریاست کے تسلیم کر رکھا ہے جس میں بیت المقدس کا علاقہ شامل نہیں ہے۔

بعض حوالوں سے دینی مدارس کے نئے وفاقوں کی ضرورت و اہمیت کا ہمیں پوری طرح ادراک و احساس ہے مگر مسلّمہ وفاقوں کو غیر مؤثر کرنے کی قیمت پر نہیں۔ اور اس سلسلہ میں متحرک ’’دوستوں‘‘ سے عرض ہے کہ اپنے گھر کو آگ لگا کر دوسروں کو تماشہ دکھانا حکمت و دانش کی بات نہیں ہوتی۔

اسرائیل کے قیام سے پہلے مفتی اعظم فلسطین الحاج امین الحسینی ؒ نے فتویٰ دیا تھا کہ یہودیوں کو زمین فروخت کرنا شرعاً جائز نہیں ہے کیونکہ وہ اس بہانے اپنی آبادی بتدریج بڑھا کر اس حد تک لانا چاہتے تھے کہ بیت المقدس پر قبضہ کر سکیں، برصغیر کے اکابر علماء نے اس فتوٰی کی حمایت کی تھی۔

مسلم دنیا میں جنم لینے والی ’’انتہا پسندی‘‘ کے اسباب میں جہاں مغرب کی سیاسی قیادت اورنام نہاد سیکولردانش کا جانبدارانہ ومعاندانہ رویہ بنیادی حیثیت رکھتا ہے، وہاں مسلم ممالک کے حکمران طبقات کا غیرسنجیدہ طرزعمل، مجرمانہ تغافل، اورمغرب کے سامنے فدویانہ رویہ بھی اس کا ایک بڑا سبب ہے۔

اقوام متحدہ کی طرف سے اسرائیل کی طے کردہ سرحدات اور ہیں، اس کے زیر قبضہ علاقے کی حدود کچھ اور دکھائی دیتی ہیں، کسی ضابطے کی پروا کیے بغیر پورے فلسطین میں دندناتے پھرنے سے اس کی سرحدوں کا نقشہ بالکل اور نظر آتا ہے، جبکہ ریکارڈ پر موجود ’’عظیم تراسرائیل‘‘ کا نقشہ ان سب سے مختلف ہے۔

حضرت علی کرم اللہ وجہہ کا ارشاد ہے ’’کل یوم لا یعصی اللہ فیہ عز و جل فھو لنا عید‘‘ جو دن اللہ تعالیٰ کی نافرمانی کے بغیر گزر جائے وہ ہمارے لیے عید کا دن ہے۔ علامہ محمد اقبال رحمہ اللہ کا کہنا ہے ’’عیدِ آزاداں شکوہِ ملک و دیں‘‘ آزاد لوگوں کی عید ملک اور دین کے وقار و رعب میں ہے۔